SANTO DOMINGO- Sant Operasyon Ijans (COE) rapòte jedi sa a ke 97 kay afekte nan Gran Santo Domingo, ansanm ak lòt domaj materyèl, akoz lapli ki te tonbe nan dènye jou yo, ki te koze pa pasaj yon depresyon sou teritwa nasyonal la.
Selon yon rapò preliminè ki soti nan Pwoteksyon Sivil la, nan sektè Los Girasoles nan Distri Nasyonal la, 41 kay te afekte pa debòdman ravin Arroyo Manzano a, pami yo uit fanmi te oblije al rete lakay zanmi ak fanmi.
Nan sektè Arroyo Hondo a, anviwon 53 kay te afekte, pami yo 13 moun te deplase, akòz debòdman ravin El Aguacate la; menm jan an tou, nan Los Guandules, de kay te andomaje tou.
Pandanstan, nan Santo Domingo Oeste, nan sektè Las Hortalizas de Herrera, te gen yon glisman tè ki te afekte de kay. Pa gen okenn viktim ki te rapòte.
Nan Santo Domingo Norte, Sistèm Ijans ak Sekirite Nasyonal 9-1-1 la rapòte yon moun ki bloke nan yon kay ki t ap kraze nan sektè El Edén nan Villa Mella, blòk 25 devan teren espò a. Ponpye yo te sove moun nan.
Zòn Nò
Pandansetan, nan zòn nò a, nan pwovens Hermanas Mirabal, Salcedo, Valverde ak La Vega, yo te rapòte inondasyon nan vil yo, fant nan asfalt, ak glisman tè.
Nan Puerto Plata, rivyè Bajabonico a te ogmante koule li epi li te kase pas ki konekte Imbert ak Saballo epi La Piragua, sa ki te kite tou de kominote yo izole.
Nan Santiago Rodríguez, yo te evakye anviwon 10 fanmi an prevantivman, sa fè yon total 50 moun ki te deplase al lakay fanmi ak zanmi.
Rekòmandasyon
COE a rekòmande pou popilasyon an evite travèse rivyè, kouran dlo ak ravin ki gen anpil dlo, evite itilize zòn naje yo epi swiv direktiv ak enstriksyon ajans pwoteksyon sivil yo.
Kanta pou moun ki rete nan zòn ki gen gwo risk ki rete toupre rivyè, kouran dlo ak ravin, yo ta dwe vijilan epi pran prekosyon ki nesesè kont posib inondasyon sibit ak vag dlo.
Yo sijere tou pou rete an kontak ak Defans Sivil, Fòs Ame yo, Lakwa Wouj la, Lapolis Nasyonal la, Ponpye yo ak Sant Operasyon Ijans sa a nan nimewo telefòn 809-472-0909, 9.1.1, *462 nan OPTIC.
Tèks avèk modifikasyon, soti nan Listín Diario.
Foto: Listín Diario.
