AFP Washington, Etazini
Plizyè milyon Ameriken te pran refij kont yon gwo tanpèt ki te frape pati lès peyi a ak nèj, glas ak gwo van, sa ki te lakòz pwoblèm trafik, anilasyon vòl ak pann kouran nan anviwon 190,000 kay lendi maten.
Sèvis Metewolojik Nasyonal la (NWS) di tanpèt la konbine avèk anpil nèj, lapli glas ak gwo van e li te afekte kòt Sidès la ak kòt Mid-Atlantik la anvan li te pran direksyon Nouvèl Angletè ak sid Kanada.
NWS avèti ke yo prevwa jiska 30 santimèt nèj sou yon zòn ki soti nan nò Ohio Valley rive nan sid rejyon Gran Lak yo.
Medya ameriken yo rapòte ke plis pase 80 milyon moun anba alèt move tan.
Depi mitan dimanch, anviwon 235,000 kliyan te san kouran nan Sidès la, men nan lendi maten chif sa a te desann a 190,000, dapre sit entènèt PowerOutage.US la.
Nan zòn ki sou mòn Apalach yo, nèj ka tonbe nan yon vitès 2.5 cm pa èdtan lendi, alòske kondisyon frèt yo ka pwolonje jiska madi, dapre NWS.
Tanpèt la te lakòz tònad nan eta Florid (sidès) ak inondasyon nan kèk pati nan kot la. Tanperati frèt ak gwo van te baleye Karolin yo (lès) ak Apalach yo.
Transpò a te gravman deranje tou. Plis pase 3,000 vòl anndan, pou ale, oswa soti Ozetazini te anile dimanch, dapre sit entènèt FlightAware la, pandan ke 4,200 lòt te an reta.
Ayewopò Entènasyonal Charlotte Douglas nan Karolin di Nò te pi afekte a, ak 1,200 vòl anile, plis pase 90% nan vwayaj ki te pwograme yo, dapre sit entènèt FlightAware la. 1,200 lòt vwayaj atravè peyi a te anile nan kòmansman lendi.
Eta ijans
Gouvènè eta vwazen Georgia a, Brian Kemp, te deklare eta dijans vandredi, epi charyo nèj yo t ap travay depi anvan midi pou netwaye wout yo.
Vijini ak Karolin di Nò te deklare eta dijans tou.
Lapolis Vijini te di sou kont Twitter yo ke yo te reponn a prèske 1,000 ensidan dimanch. "Sitou machin ki domaje. Pa gen okenn lanmò ki rapòte," yo te deklare.
Gouvènè Karolin di Nò, Roy Cooper, te deklare tou sou Twitter ke jiska 30 cm nèj te tonbe nan kèk zòn dimanch midi e ke "fòmasyon glas enpòtan ap lakòz pwoblèm nan pati santral eta a." Li te ankouraje rezidan yo pou yo evite vwayaje si sa posib.
Epitou nan eta sa a, tanpèt la te lakòz twati yon koulwa nan yon rezidans inivèsite tonbe, dapre ABC News, byenke pa gen okenn blesi.
NWS la rapòte ke te menm gen rafale nèj nan Pensacola, Florid, alòske Atlanta, ki anjeneral modere, te gen nèj tou.
Yo prevwa kèk inondasyon kotyè, epi NWS la te avèti ke van sou kòt Atlantik la ka rive nan fòs siklòn.
Lanèj te deja lakòz pwoblèm nan nòdès Etazini pi bonè nan mwa sa a. Yon tanpèt te kite plizyè santèn chofè bloke pandan plis pase 24 èdtan sou I-95, otowout entè-eta ki travèse tout kòt lès peyi a.
