Lè l sèvi avèk foto verifye epi jeolokalize pa EL PAÍS, ki soti Espay, yo fè yon konparezon sou jan kèk nan bilding, kay, lekòl ak lopital ke Larisi te atake yo te ye
Pran nan El País
Apre plis pase de semèn lagè, Ikrèn se yon peyi konplètman diferan de peyi kote "prèske tout bagay te selebre," jan jounalis Margaryta Yakovenko rakonte nan yon podcast ki dekri lavi Ikrenyen yo anvan bonm yo. Eta kay yo, wout yo, lopital yo ak lekòl yo revele enpak devastatè envazyon Larisi a atravè peyi a. Foto verifye ak jeolokalize pa EL PAÍS, yon jounal panyòl, ilistre anvan ak apre.
Katye rezidansyèl Irpin
Nan kòmansman mwa mas la, vil Irpin, ki sitiye a anviwon 25 kilomèt de kapital Ikrèn nan, Kyiv, te sib bonbadman Larisi. Pami anpil bilding ki te domaje nan atak yo, blòk apatman rezidansyèl yo make. Imaj la montre dega bonm yo te koze sou yon bilding apatman ki te tonbe nan dat 3 mas la.
Bilding Rezidansyèl Borondianka
Yon atak Larisi nan kòmansman mwa mas la te detwi mwatye santral yon blòk apatman nan Borondianka, nan rejyon Kyiv la. Devan li kanpe yon bust Taras Shevchenko, youn nan ekriven ki pi popilè nan Ikrèn e yon senbòl nasyonal.
Zòn rezidansyèl Mariupol la
Foto satelit sa yo, ke Maxar te distribye nan dat 9 mas, montre kay ki devaste nan Mariupol, youn nan vil ki te pi afekte yo. Kèk nan imaj ki pi chokan nan envazyon Ris la se sa yo ki te rezilta atak la sou yon lopital matènite ak timoun nan vil sa a.
Fakilte Ekonomi, Inivèsite Karmazin, Kharkiv
Aprè atak Kharkiv te sibi pandan premye semèn mas la, anpil kote enpòtan nan vil la te sibi domaj, tankou Fakilte Ekonomi Inivèsite Kharkiv la, ke nou ka wè an flanm dife nan imaj la.
Bilding Administrasyon Rejyonal Kharkiv la
Nan dat 1ye mas la, atak Ris yo te rive sou youn nan plas ki pi vivan nan Kharkiv, Plas Libète a, ki te antoure ak biwo ak ba. Bilding administrasyon rejyonal la vizib nan imaj la.
Plas Libète, nan Kharkiv
Sant vil Kharkiv la, ansanm ak machin ki te ladan l yo, tankou sa nou wè nan imaj sa a, te redwi an debri pandan atak Larisi yo sou dezyèm vil peyi a.
Lekòl Kharkiv nimewo 134
Bonm ki te tonbe sou Kharkiv nan fen mwa fevriye a te frape lekòl espesyalize nimewo 134, ki sitiye trè pre sant vil la. Imaj ki disponib sou Google Street View ki montre kijan lekòl la te ye a soti nan mwa jen 2015, sa ki eksplike poukisa kèk detay sou fasad la, tankou siyaj la, pa idantik ak imaj aktyèl la.
Lopital Izium
Nan Izium, nan rejyon Kharkiv, yon lopital te detwi nan dat 8 mas apre yon atak Larisi. Minis adjwen zafè etranjè Ikrèn nan, Emine Dzheppar, te deklare sou rezo sosyal yo ke lopital la te ap opere nan jou anvan yo, li t ap trete pasyan blese yo.
Lekòl nan Zithomir
Nan dat 4 mas, youn nan lekòl ki nan Zhytomyr, ki sitiye a 150 kilomèt de Kyiv, te detwi nan yon atak Ris. Panyò ki pote non ak nimewo lekòl la, 25, pa koresponn paske imaj Google Street View yo soti nan lane 2018.
