AFP
Nouyòk, Etazini
Platfòm ameriken Airbnb la te anonse yè ke li pral ofri lojman gratis pou yon ti tan a 100,000 Ikrenyen k ap sove anba envazyon Larisi a.
Konpayi an, donatè nan fon refijye Airbnb la, ak otès yo pral finanse lojman sa yo.
Airbnb te di tou li ap travay avèk gouvènman plizyè peyi Ewopeyen pou akomode refijye ikrenyen yo, tankou nan lojman alontèm.
Direktè platfòm nan, Brian Chesky, ansanm ak lòt ofisyèl konpayi an te voye lèt bay lidè nan Polòy, Almay, Ongri ak Woumani.
Depi kòmansman ofansiv Larisi a, anviwon 400,000 Ikrenyen te antre nan Inyon Ewopeyen an, dapre yon bilan AFP.
Prèske mwatye nan yo te rive an Polòy, dapre gouvènman polonè a.
Airbnb te deja ofri asistans nan mwa Out pase a bay Afgan ki t ap chèche sove kite peyi yo apre Taliban yo te pran pouvwa a. Sit la te anonse madi ke li te bay lojman gratis a plis pase 21,000 refijye afgan.
Platfòm nan te fikse objektif pou l bay lojman tanporè a 20,000 lòt refijye ki soti Afganistan, Afrik, Mwayen Oryan, Amerik Santral ak Amerik di Sid.
